Dawldanga

Khamera

2012-01-11T19:24:00.002+05:30

Keini naupan ve lai kha hmanni lawk a nia, Krismas bawr velah unau mipa zawng thawmhnaw thar inang thap ha chungin nu leh pa ten thlalakna dawrah min hruai dam dam a, chhungkua in thla kan la ho ve dial dial thin. Khang hunlai kha chuan thlalakna a la tam lova, thlala a eizawng pawh veng khatah pahnih khat bak an awm meuh lo awm e. Pu Patea han tih ngawt ai chuan Thlala Patea han tih khan a chiang kuar mai a, tun thleng pawh hian an hming bulah ‘Thlala’ kan la telh ta fo mai.

Khang hunlaia thlala a eizawng ho han lun dan em em kha. Kei lah hi naupan lai ata tawh Camera lawm tehchiam lo, naupan lai chhungkaw thlalak neih chhun chhunah pawh tap bang zo hlim tih hriat ngawih ngawih a ni deuh vek a, chhungkaw thla lak dawn lai vela nu leh pa ten min han inthlem lai vel pawh mitthlaah a la cham reng mai! Khang hunlai khan Camera kha a to viau nge, tunlai ang hian Camera neih leh thlalak lam hrim hrim kan la in tihhmuh loh vang ni dawn le.

Mobile phone kan hman ve theih atang khan Phone camera kan chelek nasa leh ta viau a, Mobile Phone nei apiangin Camera awm hman kan duh deuh vek lehnghal a. Handset thenkhat, camera nei tha tak tak pawh a tam narawh e. Tunah chuan mitin deuhthaw in thlalak theihna kan hum ta deuh vek a ni mai. Mobile phone camera leh digital camera te reuh te te, hum bo mai theih ang chi kan hnualsuat leh ta thuai a, tunah chuan SLR emaw, compact ah pawh a lawk chi ngat kan ti ta!

Puipun nikhua han awm se Camera tha tak tak, cheng sing tel teh meuh man chi rawn hum chhuak an ther leh ta fur mai. Hmanni lawka Mobile Phone Handset a thla lo lak tum ve chhen ang kha tunah chuan a tihchi ta hauh lo. Sumdawng rilru taka ngaihtuah chuan a man hmetchhuak miah lo tur kan ni hlawm anga, mahse camera manah sum kan seng huai riau tlat. Tunhma ang khan chhungkua a thlalakna dawra in zui luh dum dum a lo remchang tawh chiah lo a, chhungkaw tinin kan mamawh a lo ni ve bawk sia, tui hrim hrim mi chu thuhran nise intodelh duhin thlalakna manah sum sen kan huai ta viau mai. Nakin lawkah phei chuan camera lang miah lovin thla kan la la thei lo thuai mai thei a ni.

Keipawh hmanni deuh khan ka lei thar ve a, ka nei rei telh telh a, ka hmang thiam lo telh telh lehnghal. Tunah hian a bul atangin Instruction Manual ka chhiar zo leh dap tawh a, nasa takin hma ka sawn phah lem chuang lo, ka thatchhiat em vang a ni tawh hrim hrim ang. Trick Photography and Special Effects tih lehkhabu ka chhiar leh mek a, ka chhiar kar lakah he thu hi ka’n thaikawi vel mai mai a ni e.

Hnam inpumkhatna leh a behbawm

2011-04-01T19:51:00.001+05:30

Pawi khawpui Lawngtlai a ka awm lai khan vawi khat chu kan titi naah kan thu a in bat sual palh deuh a, Chinzah tlangval pakhat hian, “Nangni Mizo ho...” min ti ta mai a. Kei aia an Mizo lohna bik ka hriat loh avangin fiamthu titak deuhin kan inchhuah thei ta hram a. Chutih mek laiin helam chhuak Chinzah tlangval ve tho chuan Burma rama Chhakchhuak leh Fanai pa chu, “Nangni Burma mi mai mai, Mizo pawh in ni ve lo...” tiin a lo deusawh ve mek lawi a; Chinzah theuh theuh pawh a then Mizo, a then Non-Mizo tihna a lo ni reng mai!

Chi (Mizo) thliar hran na’n Thisen hmang lovin International, State leh District Boundary kan lo hmang reng tih ka lo hre ve miah lo a. Chuti a nih chuan England a pem ta kan Mizo unaute khu Mizo ni tawh miah lovin emaw, Mizo nihna zawng zawng bo vekin English/British an lo ni vek tawh a, US a pem ta te lah American; Israel a pem, saphun ho thlengin Israeli an lo ni fai ta vek mai! Ka pawm chiah lo. Burma ramah piangin seilian mahse Chhangte/Chhakchhuak/Fanai/Ralte/Sailo/Hmar etc. a nih miau chuan enge a Mizo (Mizo ti zel tawh mai ang) lohna, US khua leh tui ni tawh mahse enge a Mizo lohna ni ta ang, a thisen zawk kha a ni lawm ni ti Mizo tu chu?

Mizo hi chim ral tham lek khawpa tlem kan la ni a, chim ral kan hlauh a leiah Rel kawng rawn lut tur nia tlang thang ringawtah pawh thenkhat chu kan lo khur chhe nghal titih mai. State dangin MP a za tel an neih laiin keini chuan vanneihthlak takin pakhat kan nei ve thei hram a, kan la tlem bawk em a ni. Kan beisei ang hmasawnna hi kan ramah hian rawn luanglut ta tak tak se hnam chitin chitang kan in sulpel zut zut anga, a Mizo a te kan in pumkhat that loh phei chuan chimral kan awl viau ta ve ang. Chuvang chuan ‘Mizo’ kan nihna ang hian kan dam khawchhuak in kan dingchhuak thei tak tak dawn em tih hi Luka ziak tlukin a la chiang miah lo niin a lang; inti taurau inthendarh a, tham kan la ni mawlh lo a ni.

Hnam inpumkhatna kawngah hian harsatna neuh neuh a tam hle. A thenin Mizo nihnaah an lungawi lova, a then lahin chung lungawilote chu thlem a hnekin kan hmusit zui a. A thenin thisena kan chipui ngei te pawh hnam dang enin kan en lui tlat a, a then lahin Mizo han nih kher ngai an lo ti lo rawl nen; inpumkhat tak tak hi chu a la hla angreng. Hemi kawngah hian a mawhphurtu lian ber chu a Inpui nghaktu, Mizoram chhunga chengte hi kan ni. Keini hian rilru zau tak pu ila, kan duhzawng chiah ti Mizo a, kan duh loh zawng ti ‘Non-Mizo’ ngawt lo hian kan zavaia kan lenna tur kan buatsaih a ngai a ni. Boxer Zoramthanga khan khawvel mit hmuhah Mizo a chawimawi nia kan hriat avangin ‘Burma mi’ kan ti kan ti lova, Mary Kom takngial pawh kan ti Mizo lui hram hram zel chu a nih hi. Olympic a Mizo tel hmasa ber pawh thalkapthiam Lalremsanga tiin hun rei tak chhung kan hria a, mahse tunah chuan a danglam leh daih tawh; Burma ram ami, Mizo Boxer pakhat kha Olympic-a Mizo tel hmasa berah kan sawi leh mek tawh a, ‘Burma mi’ kan ti lova, ‘Mizo’ kan ti.

Burma rama Fanai pa khi ‘Burma mi’ kan tih dawn chuan kan kawmchhak Fanai pa pawh khi ‘Burma mi’ kan tih ve a ngai tawh dawn lawm ni? Kan awmna ram, sawrkar, sik leh sa a danglam vang maiin kan thisena min ti Mizo tu hi a danglam thei dawn lova; anni khi ‘Mizo’ angin khawvel in hre lo mahse ‘Chin’ an nihna leh ‘Mizo’ an nihna a danglam chuang lo. Lusei chauh hi ‘Mizo’ ah kan ngai dawn a nih chuan kohhran, khawtlang leh ram hruaitu ‘Non-Mizo’ kan van lo ngah tawh dawn tehlul em!

‘Mizo’ tih chhunga mi tam takin kan rinluh heng Lusei, Hmar, Pawi, Lakher, Thado, Paite, Hmar etc. te hian hnambil tawng kan nei deuh vek a; a tam zawk hi chuan Mizotawng kan tih mai, Duhlian tawng hi an thiam deuh vek bawk a; hei hi kan impumkhat theihna tura hmanraw tangkai ber pawl a ni. Pawi(Lai) ramah ngei pawh sawn Lai Fa, Lai tawng thiam mumal tawh lo, Duhlian tawng/Mizotawng a lar em vanga Mizotawng chauh hmang an tam khawp mai, a piah leh deuh Saiha chinah chuan tlemin a danglam deuh. Kan hnambil tawng te hi in zah sak ila, chawi nun/lar lutuk pawh tum bik lo ila, Zo hnahthlak zawng zawng ten kan thusawi kan in hriat pawh tawn vek theihna tura tawng awm - Duhlian tawng, Mizotawng kan tih bawk hi hmang uar sauh sauh ila a tha hle ang.

Kan inpumkhat lohna hian zawi muangin min then darh mek zel a; chhim lam kan en chuan District Council hnuaiah awmin Mizoram Sorkar in a duhsak vak lo nia an inhriat avangin Central atanga pawisa lo kal tur pawh anmahni kuta kut nghal turin hma an la reng a; UT Demand pawl an awm deuh reng bawk. YMA a awm ve lo a, MHIP pawh tih tham an awm lo, Kohhran pawh tiamin engkim mai hi hnam bil angin a kal vel vek mai a ni. Heng thil zawng zawng hi kan hnam inpumkhat tawk loh vang ni berin a lang a, a pawi hle.

Mizoram chhungah ngei Mizo Zaimi Insuihkhawm Pawl Branch pakhat an din vang ringawta kut tuar tu khan mi kut thak a tawrh nachhan ber chu ‘Mizo’ tih lai tak hi a ni. Chumi awmzia chu hmun danga kan chipui, kan unaute nena inpumkhatna tha tak kan siam theih nan he Mizoram chhung ngeia ‘Mizo’ awmte hi kan in pumkhat hmasak phawt a ngai tihna a ni thei angem?

Hre tlem la, nunpui rawh

2011-02-23T10:13:00.000+05:30

Kan Update khat bawk a - tun tum chu ngaihdan maksak leh mawlmang tak, khal deuh tak ni bawk hmangin update zuai teh ang.

Kan hmel leh pianzia te a inan loh ang bawkin kan rilru puthmang pawh hi a inang vek thei lo. “Unau thawnthu sawi mah a dang” an lo ti thin a, kan hriatdan leh ngaihdan te hi lo inang vek ta se tun dinhmun hi kan la thleng kher lo mai thei.

Kan rama Krista Chanchintha lo thlenna kum 100 chuang fe a nih hnu hian Bible chhiar chhuak mi tam tak an awm tawh a, a ziah a ziak chhuak te pawh sawi tur an awm nawk mai! Pian tirh atanga Krista Chanchintha a chawm len, Sunday School kal chhuak thlap kan ni hlawm bawk a, a nawlpui hi chuan Vanram min hruai thleng thei tur khawp ‘Pathian thu’ hi kan hre ve tawh a ni. Chanchintha hril tura inpe, pawn lama penchhuak kan nih si loh chuan chu baka thil pawimawh chu enge la awm le? Khawhar inah han kal ila, a ding apiang mai hian keini ang aduang min ti mur sung sung thei khawpin Pathian thu te hi an sawi thiamin an hre tam a, kan Rawngbawtute pawh hi Pulpit-ah dintirin Bible hi han keu thawk se la, “Jordan luiah va kal la, vawi sarih va inhnim rawh” tih chang chauh pawh kha han chhiar se darkar 3/4 daih sawi zui tur (sermon) an nei deuh fur ang, nei lo chu tlemte an ni zawk mai thei. Pathian thu sawi thiam leh hriat tam lamah kan Sap chah chhuah ho te khan kan Revival Speaker leh kan Evangelist te chu sawi loh kan Kohhran Upa te hi an tluk kan ti em?

Lal Isua min zirtir dan a nih miau avangin chanchintha hi kan hrilin kan puangdarh tur a ni tehmeuh mai; mahse keini Kristian ang em em a sum leh pai tam tak seng chunga sakhaw dang zuitute sawm nasa hi an awm ve reng angem? Chuti chung chuan chil chhak phak leka awm Tuikuk leh Chakma ho pawh kan la ‘thunun’ thei miah lo chu a nia! Kan ramah suahsualna a pung tual tual a, kan duham telh telh a, kut tling lova sum lakluh kan pawisa lo telh telh a; kan nunah hian hmuh tur a awm ngang lo bawk a; heng mite hian keimahniah ‘danglam’ an hmuh loh avangin kan ‘thunun’ thei lo a ni zawk. Pathian thu sawi thiam leh hriat tam lamah chuan kan sang ve fu; mahse hei vang ringawt hian Vanram kan kai phah dawn der si lo. A taka kan nunpui a ngai zawk a ni.

Pathian tana inpumpek, a rawngbawl tura pen chhuak; tawng mawi lo ni lo se nupui fanau chawmna atana thlang tam tak an awm a, heng thil hi chu anni kutah hian dah ta mai ila, a nawlpui hi chu ‘beram tha tak’ ang chauhin awm ila, tichuan kan sakhaw puithiamte pawh hi an hlu zual sauh anga, an thu kan ngaichang anga, kan zah bawk anga, kan lo mamawhzia pawh kan in hrechhuak thei ang. Tunah chuan kan Pastor te aia Pathian thu lama ril Kohhran Upa leh Rawngbawltu tam tak kan nei mek a; Pathian thuin min chiah hneh lutuk a leiah kan buai zo a ni. Gospel Camping te hi kum 5 dan velah chiah buatsaih thin ila, tichuan Pathian thuah kan tuihal huam huam anga, intuaihriam kan mamawhzia te, kan chak loh zia te leh kan lo sual zia te kan in hrechiang thei anga; tak pawh kan tak phah deuh mahna.

Chhungkaw tinin Vanram Chahbi awmna bu pahnih pathum kan nei deuh vek a, kan mamawh tawk chu kan in todelh vek. Chutah chuan kan tih tur leh kan tih loh tur tam tak a inziak a, kan chhiar thiam vek bawk a, kan mawhphurhna liau liau a ni tawh. Chanchintha Bu 4-ah khan Isua tawngka ngei hmuh tur tam tak a awm; tih tur tam tak min tuk a, kan tih loh tur chin ramri fel takin a hung thlap bawk. Chu chu kan tana Vanram Chahbi awmchhun a ni. Ngaih loh lamah lo ngai lo ila, “Jordan luiah vawi 7 va in hnim rawh, “I naupanna tuman ngainep suh se” tih chang tlawhchhana sermon han thlak ve duah nen chuan a in kungkaih tawh vak lo.

Isua khan amah ring turin min ngen lawm lawm a, amah a kal lo chu tumah Pa hnen an thlen loh tur thu pawh Johana ziakah te khan hmuh tur a tam khawp mai. Chu bakah chuan a tawngka ngeia min chah, tlang chunga a thusawi ang chi te, a zirtirte ho hnena a thuchah ang chite kha kan tana thu pawimawh vawrtawp a ni. Pathian thu inti hria leh inti ril bik nih duh ang hrima kan lo inhnial ve chiam te, kan bula mite aia hre tam zawk deuh hlek nih tum ang ziazanga kan lo inzir ve tlut tlut te hi kawng min tibotu mai a ni. Enge Vanram luhna Chahbi chu ni ta - Lal Isuan ti tura min tih TIH a, ti lo tura min tih TIH LOH a ni mai, chu chu Chanchintha Bu 4-teah khan chiang takin a inziak vek a, kan chhiar thiam a, kan hrethiam bawk.

* Pathian duh loh zawng ka lo tarlang tel palh a nih chuan Pathian in min ngaidam teh se.

Khawkhawm a pawimawh

2011-01-09T11:13:00.000+05:30

Mizoram zimte a han vah vel nikhua hian thingtlang khua te tak te te, In 100 pawh tling tha thum lo hmuh tur a awm fur mai. Kum 2008 MLA inthlan tum khan ka thianpa chuan a Duty na khua tet zia a sawi ka la hre reng thin. Chu khuaah chuan dawr pakhat chiah a awm a; sahbawn tlemte leh Antam bak an zuar lo! Dawr nghaktu ber lah chu leipuiah a lo kal daih bawk a; a buaithlak ve duh khawp ang. An khua mipui zawng zawng deuh thaw eizawnna pawh LONEIH a ni.

“Kan Hun Tawn Zingah Khawkhawm A Pawi Ber Mai” tih hla te pawh kan nei na a; sum leh pai, eizawnna lam zawn atanga kan thlir chuan Khawkhawm hi tih makmawh a ni. Thingtlang khua thenkhat, Motor kawng luh lohna te, Jeep Road chhe takin a pawh ve hram hram khua atanga eizawnna hautak tur zia te, Ration lakluh hautak tur zia te hi ngaihtuah tham ve tak chu a ni. Eizawnna lah nise Lo neih bak duh thlan tur a tam a rinawm loh a; kan va hmuhsitna ni lo se, hmabak a eng vak lo a ni.

Kan State Capital Aizawl leh 2nd Capital Lunglei inthlauhzia kan hmu a; Lunglei leh District dang Capital te pawh hi inthlau veleh chhawng tak a ni. Mihring tamna ah na na na chuan eizawnna a lo awlsam a; thingtlang chengker a cheng, thiam nei mumal lo te tan pawh khawpuiah chuan kawngsir daihlimah Kuhva, Meizial leh nepnawi vel zuarin hahdam takin a khawsak ve naw naw theih a; thingtlang ai chuan duhthlan tur pawh a tam ve deuh. Mi taima tan lah mi hnuaiah inhlawhfak na tur a lo tam veleh zel a; hetianga eizawng, chhungkua nupui fanau chawm hi tunah mai pawh hian an tam viau awm e.

Khaw te tak te te hi sawikhawm ni dawn ta se - ‘Kan Pi leh Pu te lu lo nghahna a nia....kan tan chuan chhuahsan a harsa...’ tia hnial duh tawk an awm ngei ang: hetiang rilru hi kan paih bo a hun tawh takzet a ni. Aizawlah pianga seilianin Aizawl bak hisap(?) ah a tel thei ngai lo; mahse hunte an kal ve zel a, thingtlang/hmun dangah loh theih loha tei chhuah lawp lawp a tul hun te a’n lo in herchhuah meuh chuan khawii hmunah nge lu kan phum ang tih vel ngaihtuah miah loh chang a awm ta fo mai. Kan tana eizawnna remchang, ei kan hmuh theihna hmun, kan dam khawchhuah theihna hmun huaisen taka pan tawp mai hi kan tih tur ni awm tak a ni.

Ka Pu, i va mawl ve

2010-12-11T15:34:00.000+05:30

Sorkar hnathawk thenkhat zingah biak harsa tak tak, an rawngbawl sak mipuite tana in hawng miah lo, mipuite tanpui chu sawi loh anmahni dawrtute lo vin hrep ching an awm tih an sawi thin a. Hetiang hi tun hnai maiah khan ka tawng ve nawlh mai!

Thil pawimawh tlemte buaipuiin Office pakhatah ka leng lut ve a; chhuak leh mai tura ka insiam lai chuan ka hnung lam atang hian hmeichhe aw in, “Ka Pu, i va mawl ve a; i rawn kal ngun tawh tehreng nen ...” tih bawrh bawrh thawm ka hre ta. Ka’n hawi phei a, nu pakhat bulah hian putar kum 70 bawr vel, inthlahrun hmel taka lo ding zum reng ka hmu a; tanpui ngai nia ka hriat avangin ka pan phei a, a thlavang han hauhsak mawlh mawlh pah chuan ka theih ang tawkin ka buaipui zui ta a.

He thil hian ka rilru a ti kal thui hle mai. Sorkar hnathawk tam tak hian kan mawhphurhna te hi kan hre famkim tawk lo em ni? Khel lova thla tin hlawh lak ringawt hi em ni kan thawh chhan? Mipuite tanpui, mipuite laka hawihhawm chhuah hi kan/an mawhphurhna a ni lo em ni?

Kan ti ta sa sa; heti hian an sawi thin-

1. State Bank hi dawr an harsa

2. A&T (Accounts & Treasury) pawh hi dawr an nuam lo (kei chuan nuam ka tia)

3. A tlangpuiin hmeichhe ho hi biak an harsa.

4. Chhuan (politic or department lamah) nei tha ho hi an in duh.

5. Biak harsa deuh hi Rank hniam lam an ni duh chawk.

Tunlai naupang tak hi chu aw...

2010-10-31T08:52:00.000+05:30

Pathian zarah fanu pakhat, kum 3 tling tep tawh hi kan nei ve a, kut hlei chi tih takah kan in veng seng lo lek lek ta fo mai! Thian a kawm tam ka phal loh a leiah Computer leh TV a thutchilh nasa a, pafa a Computer han inchuh rap rap chang pawh kan nei fo. Ka khawih lai a hmuh hnem avangin thiam ve ta ah a inngai a ni deuh ber; Screwdriver a Motherboard a lo hawlh ngang ngang lai vawi khat ka phawk tawh a, DVD Rom ah hian CD a hmuh hmuh thun ve mai a ching bawk a, ka Online mawlh mawlh laiin Computer min siam sak(?) a tum fo bawk!

Nursery Rhymes ka dahna (1. My Computer, 2. Drive D:, 3. Documents, 4. Naupanghla) hi a hmeh chhuah thiamna pawh a rei ve ta; ti hian amahin a lo hmet chhuak a, a in Play veleh naupang lam lai en enchungin a lo lampui ve mai thin. Games a khelh duh tumin (1. My Computer, 2. Drive E:, 3. Games, 4. Pocket Tank etc. etc.) hmehchhuah pawh a thiam nal hle. Chess hi ka khel lai a hmuh ngun avangin a awmzia hre miah lovin a’n khel ve ngawt a; a tuipui viau bawk.

Hmeichhe naupang ni si Motor siam pawh zu tui fu a!!!

Khawnglung kan run ni kha...

2010-10-19T21:40:00.000+05:30

Mizo nunhlui a nula leh tlangval inngaihzawnna thawnthu lungchhiatthlak tak lo chhuahna Khawnglung khua hi tunah chuan Wildlife Sanctuary a ni tawh a; vanneihthlak takin chu Sanctuary a ramsa awmzat chhiartute zingah ka tel ve hlauh mai.

Aizawl to Lunglei Road (via Hnahthial) kawnga kalin Bungtlang leh Rawpui inkarah Khawnglung panna kawng peng hi a awm a; Motor-a kalin Aizawl atang chuan hahdam takin darkar 6 bawr velah a thlen theih. National Highway atang hian Jeep Road in a peng a, kawng a that lem loh avangin kein kal a ngai thung. Km 4 vel zet ke ngawta kan kal hnuah Sanctuary Area, Khawnglung tlang bulthut chu kan thleng ve ta hram a; Sanctuary area atang chuan kawng a awm mumal tawh lo a, kar khat daih tur Ration in ak bawr teuh chungin tlang chhip a awm, Khawnglung khaw hlui lam chu kan pan chho ta. Kawng tum hlui deuh tawh chu a awm ve na a a hnim bakah nuamsa taka kal theihna a ni lo hrim hrim a; tlang chhip han thleng tur pawh chuan hun a duh rei khawp.

Tlak lam pangper atanga lut chho kan ni a, kan kalna kawng bak zawng kha chu kham pang awih tak tak vek a ni a; tawlhthluk palh vaih chuan damkhawchhuahna chi rual a ni lo. A tawpa tawpah chuan an sawi fo thin Khawnglung luhna kalkhan awmchhun, Khawnglung Run hunlaia Khawnglung tlangval te’n an in ven chhawk thin kha kan thleng ta hlawl mai. Lung bang Feet 20 bawr vel zeta thui, Feet 8 vela zau hi a ni a, chhuah lam leh tlak lam chu kham bung vut mai a ni nghal a, lungbangah lah chuan han lawn chi ziazang a ni hek lo. Chulai hmun atang chuan tlangdung, tlang chungzawl pharh duai mai, Khawnglung khaw hlui awmna chu a in zar pharh nghal a; a luhkhan a awih tehreng nen rin aiin tlang chungzawl chu a lo zau daih mai.

Hmun remchang kan hmuh hmasak berah riahbuk kan sual nghal a; kan riahbuk thlang lawkah chuan kum 1980 chho vela Khawnglung khua luahtu hnuhnung ber te’n tuikhur an siam pawh tha takin a lo la awm nghe nghe a; chu tuikhur bak chu an sulhnu han hmuh mai tur a awm tawh lo. Zingah khua a lo var a; ramsa pawh chu chhiar ta mai lo chuan Khawnglung khaw hlui chu kan fang ta a, Lal In awmna te, Zawlbuk awmna lai te, Thanghniangi thingphur Chalthanga’n a ‘englo’ na lai vel te pawh an lo la chhinchhiah tha hle. A hmun hma hrim hrim hi a rem tha a; a thengthaw nuam em em bawk a; ngaih bik pawh nei lem lovin lung hi a leng veng veng thei zu nia. A ram a upat tawh avangin thing lian tak tak a tam hle bawk; ngaw hnuai vel lah chu a thelh fai hun mai a, Vahrit leh Ramar hnu pawh hmuh tur a tam hle.

A tukah lehah chuan tlang pangper chuan hnuai lamah ramsa chhiarpui kan nei tan ta a; chhun khaw en lai chuan hmuh tur a tam lem lo. Sava lam chi hrang hrang bakah Sanghal, Zawng, Sathar, Sakhi etc. a la awm nual niin an sawi a; Rawpui khua amite phei chuan Sakei pawh a la awm thin an ti nghe nghe. Zan li zet kan riah hnuah chuan Report pek thuai thuai a ngai an tih avangin Aizawl lam panin hniak pherh vungin kan tlan haw leh ta a ni.

(Thla te kha kan la ve ngei chu a nia(h), khawiah nge a awm zawh tak ka hre mai lo)

Vanram i kai bik kher lovang!!!!

2010-10-14T16:31:00.000+05:30

Chiahpuam khan pawisa kan lo ngah hlawm zia leh peipunna awlsam kan duhzia a lantir rualin kan depde zia pawh a tilang chiang a; Buhfai leh eirawngbawlna Gas-ah harsa mah ila pawisa chu tute kutah emaw chuan a tam hle tih pawh sawilan tel kher a tul awm lo e. Tlang chunga thusawitu khan mihausa tan Vanrama luh aiin Sanghawngsei hriau benga a luh pawh a awlsam zawk tur thu hawrawppuiin min hrilh na a keini ang duang paw’n thei leh thei lovin thla tin Rs. 4000/5000 tal khawl khawm kan la tum ve fan a; kan tum ber chu mi anga hausak ve a ni tlat.

‘Lehkha i zir that loh chuan kut hna i thawk ang..... i la rethei ang’ tia chawm len kan ni vek hlawm a; hausak (?) ve hi kan thupui ber a ni; Isua mak tih ngei turin Hausa chunga Vanram kai hram kan tum hlawm te pawh a ni mahna. Bek a thlantui luang zawih zawih a hnathawk a, ei hmu tura ruat kan nih laiin sum peipunna awlsam lam kan bawh huam huam a; thlan tla kher lova sum hmuh dan zawngin kan intlansiak a, chumi karah chuan Bumtu pawh an lo inlar zel e.

Mizorama khawpui lianber dawttuah pawh hetiang inbumna hi a thleng tawh a; District Capital pakhatah pawh tun hnai khan hetiang lam chi inbumna liantham a thleng tih chanchinbu lamah te pawh kan chhiar tawh kha. Kha inbumnaah khan hmeichhe pakhatin Contract hna a thawk nia insawiin mi 8 hnenah sum tam tham tak a puk kual a; a zavaia belhkhawm chu ka chhinchhiah chinah chuan Rs. 25606250 (Vaibelchhe hnih maktaduai nga, nuai ruk sangruk zahnih leh sawmnga) a ni. He nu hi 420 IPC hnuaiah Case 8 awrh tir a ni.

Ka rilru a lang zawk tak a chu kan rama pawisa lo tam lutuk hi a ni. Keimah atanga ka chhut chuan Nuai 60 chuang inpuk tir theitu khi chuan a tlem berah Nuai 200 bawr vel a neih a ka ring a; ka ring dik miah lo bawk ang. He khua hi Sumdawnna hmun tia hriat lar a ni ngai lova; mihring an tlem a, 1st Class Contractor an awm meuh lo a, tun thleng hian State Sorkar leh District Council Sorkar atangin hmasawnna lian tham an siam sawi tur lah a la awm hek lo. A khaw hlun chuan ram chu an ngah teh meuh ang a; mahse a hlutna erawh Aizawl a inhmun lo ram nen chuan inthlau tak a ni ang. Sorkar hnathawk tan hausak a harsat zia chu sawi kher a ngai lova; mahse pawisa an ngah tlat.

Mi pawisa ngah leh peipunna zawnga an in puk tir vel te, an han inbum zui ta te hi ka tan chuan awmzia a awm lem lo a; ka vei zawk a chu Pawisa kan neih dan hi a ni. Bek a thlantui luang zawih zawih a ei hmu tur leh mi hausa tan Vanram kai a harsat tur thu inziahna bu hi kan rinpui ber leh innghahna a la ni reng a; chu lehkhabu chu thenawmte ta hawh kher ngai loin chhungkaw tinin kan intodelh vek a; chhungkaw hming kima nei lah an tam viau ta ve ang; mahse....mahse kei ngei pawh hian ka zawm thei si lo.

Kan nuih a za lo ang!!

2010-10-11T09:34:00.000+05:30

Office ka thleng fel awrh tihin ka hriat than em em Bell ri kha a lo ri leh ral ral a; ka rin lawk ang ngeiin keimah min kohna bawk a ni. Phur vak lo chungin Bell hmettu pindan lam chu ka pan phei nghal a; ka va luh lai chuan lehkha hlui hi a lo sam mawlh mawlh a, min hmuh veleh chuan nui deuh sang chungin Rape Case pakhat hi a rawn lek chhuak va a.

Chu Case chu nikum (2009) October thla ami daih tawh kha a ni a; mi pakhatin hmeichhe naupang pathum, unau vek lehnghal a pawngsual chungchang a ni. A tuartu mi pathum ni si, Police te’n Case pakhat chiah an siam avanga a phun nuah nuah hnu chuan Mizorama pawngsual case tam lutuk chu enge a chhan tiin min zawt ta thut mai. Mizotawng pakhatmah a thiam lo mai ni lovin Mizo zia leh kan khawtlang nun engmah a hre lova; Mizoram pawh a vawi khat rawn kalna ani tih te ka hriat sa avangin awmze neia ka chhan loh chuan a hnam angin kan mualpho dawn tih ka hre nghal.

“Mizoram chu khawchhak lamah Myanmar, khawthlang lamah Bangladesh nen kan in ramri a, heng ram atang hian dan lova rawn lut ru tam tak an awm reng a, anni hi pawngsual leh tualthah case ti tamtu chu an ni” tiin kan rama pawngsual case tam chhanah Foreigner ho ka puh ta ringawt mai. Ka thusawi chu a pawm chiah lo tih pawh ka hre reng na a; ka tanna ngaiah ka tang lui tlat a, rei ngial kan in chai hnu chuan, “Mizoram hi mihring awm zat atanga chhut chuan India rama pawngsual case tamna ber a ni awm e” a ti ta a, ka nuih a za vak lo.

Ka chhuahsan hnu chuan tun hnai kum 3 chhunga Special Report Case intlar tuarh chu ka’n en thla zar zar a, pawngsual case inkarah tualthah case, sum tihchingpen case leh pawisa lem case a lo inzep ve zeuh zeuh chauh a lo ni; kan pu-a khan a lo sawi dik chiah mai. Pawngsual case tam zawk chu naupang kumtlinglo pawngsual a ni a, pawngsualtu hming inziahna ka’n en zel a, Foreigner an tlem zawk; ka lo daw chiang kher mai.

Rape Case tam lutuk ti tlem tur hian engtin emaw chuan hma kan lak a hun ta. Miin naupang kumtlinglo an pawngsual hnu lawka kawng han zawh leh ringawt mai hian awmzia a nei tawh lo a; naupangte enkawltu ber, an nu leh pa te lamah kan tuan a hun tawh takzet a ni. State dangte Crime Figure chu ka hre chiah lo a; mihring awmzat atanga chhutin Mizoram hi Pawngsual Case tamna ber lo ni ta ila, National Newspaper te hian chu chu hriain han tichhuak ta mai se; Bell hmettu hmaa ka awmdan ang chiah khan kan CM ho ho hian za lo deuhin kan la nui suk suk in ania ka rin.

Mi hlawhtling inang lo pahnih

2010-10-09T13:42:00.004+05:30

Tuilet hma atang tawh khan mihring te hi hmalam panin an lo intlansiak daih tawh a; Civilization ropui leh hausa tak tak te kha tunah chuan a bo zo tawh a; an hausakna te lah chuan kum tam a daih si lo. He leia kum 80-100 chhung atan a thim a var thlu lovin kan intlansiak a; petek sual palh a bo hlen ta vang vang te, khawtlangin in an ensan phah tak te, ram leh hnam hmelma lo ni zui ta te an awm rualin mihring ngaih a ‘mi hlawhtling, mi ropui’ tia sawi tur tam tak an awm a; chungte chuan hriat zui an hlawh chawk.

‘Hlawhtlinna leh ropuina’ hi a tehtu a zir a ni. Hlawhtlinna nia kan ngaih nazawng hi midang tan hlawhtlinna a ni kher lo thei a; ropui kan tih nazawng pawh hi midang tan a ropui vek hek lo. Kamding in fapa kamding a nei a, Doctor in fapa Doctor a nei a; Engineer in fapa Engineer a nei a, IAS in fapa IAS bawk nei mahse nitin inhlawhfa chawpa eizawng, aidu leh dailuah aia chawhmeh tha hmeh zen zen lo, Sa lah thla khatah vawi khat bak hmeh phak lo chhungkua atanga fapa kamding lo chhuak te hi an ngaihsanawm zawk tih ka pawm nghet hmiah a; an harsatna tawh zozaite pawh midang tan chuan thil nuihzatthlak tak pawh a ni ta ve ang.

An hlawhtlin ni a an hlim hmel te pawh Ralkapzauva’n (CC Coy. 27) “Ka Pa hlim hmel chu a hmusit duh tan chuan hmuhsitawm tak a ni ve reng a” a tih angin midang tan chuan thil hmuhsitawm a ni ang. Inhlawhfa chawp a ei ve tawk tawk chhungkua atanga kamding ve chang chang chherchhuak tura kawng thui zia hi kan ngaihtuah ngai em? Kamding sa, eizawnna mumal nei sa chhungkua atanga chawrchhuak IFS/IAS/Engineer/Doctor etc. ni ta te hian an tum ram an thlen hma hian chemfawng engzat nge an sah chhiat a; nghawngkawl thar engzat nge an neih hman? An inhlawhna te’n an ban avangin vawi engzatnge tap chungin inah an haw? Thosi kapa inhlawhfain veng engzatnge an hrut chhuah? Bawngtuthlawh engzat fakau nge an cheh chhiat ve?

Taksa hah lutuk sil them thum chunga lehkha zir tho a han ngai te, eitur mumal neih loh te hi chu thil paltlang harsa a ni lem lo; chu thilin a kentel BEIDAWNNA han paltlang meuh tur hi chuan kamding fate’n an la hriatthiam ve phak reng reng loh PAUKHAUHNA leh TUMRUHNA neih a ngai a ni. Kamding fate harsatna tawh ve ai ngawt chuan anni harsatna tawh hi chu a deh a khirh talh mai a; thih leh dam inkar thil tak tak zu ni tlat a. Anni tehna tlang atang chuan kamding in fapa kamding bawk an nei te, Officer in fapa IAS/IFS an neih te, Doctor/Engineer in fapa Officer lian tak an nei te hi ‘FAKAWM’ an ni ve satliah ringawt a; MI HLAWHTLING/MI ROPUI an ni ve lem lo a ni.

(A sei lutuk hma in duhtawk phawt ang. He thu hi ka thianpa, mirethei fapa (?), tuna NPCC a thawk mek tan ka hlan e)

Zawhna tawp thei lo chu !!!

2010-10-05T09:19:00.005+05:30

Kum tam a vei ta; a ni chiah erawh ka hre ta lo. Tomir thla chawhnu lam a ni a, sikul luhna tur buaipuiin mahni tawkah ka buai ve hle mai. Chaltlanga MBSE Office-ah Migration Certificate la turin ka han chho ve hna hna a, ka Document pawimawh zual pawh ka keng kim thawkhat viau.

An Office ka han thleng chu ka rin ai daihin a lo lian a, ka mualpho loh nan a rukin ka tawngtai mawlh mawlh reng a. Migration Certificate an lakna hmun ka’n zawh te te hnuah inhnuai lam chu ka pan thla ta a. Inhnuaiah chuan Corridor angreng deuh hi a lo awm a, chutah chuan ka rin loh deuh maiin midang pawh an lo awm ve nual a; keimah ang rual vel pawh an nu leh pa te’n an lo kalpui hlawm avang chuan tlemin ka zahna te pawh a bo ta deuh. Office chhungah chuan ka lut ta nghal a; thil tihfel ngai ang ang ka’n tihfel hnu chuan reivaklo lo nghak tura min hrilh avangin pawn Verandah lam pan chuan ka chhuak ta a.

Pawna ka va chhuak chiah chu thil hmuh ka nei ta; kawngka ep zawng chiaha ding tleirawl pakhat chuan min lo en kar mai. Keimah ang rual vel chauh a ni a, a rukin min nuih emaw tih mai tur khawpin hlim hmel hi a pu a; a kut leh ke, a incheina leh a bula ding a nu incheina ka’n en thuak khan keini ang han cho phak an ni lo tih ka hre nghal mai. A sam chu sikul naupang sam atan chuan a sei mah mah em aw ka ti rilru a, a hmel sawisel bo, mitmeng nelawm tak leh a fu ke nalh lutuk chuan khaw dang min hawitir thei ta meuh lo. Ka rin ang ngeiin a bula ding chu a nu a lo ni a; keimah ang thoa bangbo an ni ve a mahna, anu chuan ka thil tih min zawh pahin Provisional Certificate lakna hmun min zawt a, Pen hman hawh min dil nghal bawk a.

Anu in Office chhungah an thil vel a buaipui lai chuan kan pahnih in pawnah chuan kan lo nghak a; ‘Thil’ han in zawt rual kan la nih loh avangin kan inen a, kan innuih sak a; rei kan in en ngam lo. Mitkhap kar lekah kan mit leh mit a intawng leh chat a, han innuih deuh var var bak tih theih a awm si lo; a va’n hahthlak tehlul em! Min haw lo tih ka chian tluk zetin ka haw bik lo tih a hria tih ka chiang a; kan inbe ngam der si lo. Reilote hnuah a nu chu a lo chhuak a; haw an tum ta mai. Kei lah ka thil ka la tihfel zawh loh avangin ka la haw thei si lo a, an veng takngial pawh ka zawt hman ta lo. Rilru khingbai taka Minute 10 vel ka awm hnuah Office chhung atang chuan min rawn ko lauh lauh a;

“Naktukah rawn ngaihven zui mai ta che”

A rang a rangin ka tlan chhuak nghal; khawi lamah nge an kal ang? Dawrkawn lamah nge Ramhlun lamah? Chaltlanga awm chu nise MBSE Office-ah kher chuan an bangbo ka ring lova; Ramhlun lam panna kawng chhuk thlaah chuan chak mangkhengin ka lim thla ta pur pur mai; mahse ka hmu hman ta chuang lo. Beidawng takin Bus kal mai turah chuan ka inzep ve ta ringawt a, a tawt kher mai. Israel Point kan thlen phei chuan tlemin a lo ziaawm ta deuh a; engtin tin emaw Bus hmalam pawh ka hmu ve theih ta. Bus kawngkhar bul atang chuan tlemin ka’n in hnawh lut lui ve a; Passenger kan la din khah thup avangin khaw hawina a la awm chuang der lo. ‘A lum si, kawngka bul lamah bawk ding leh mai teh ang’ tia ka in ngaihtuah mek laiin Bus hma lamah chuan kha tleirawl bawk kha ka va hmu leh ta thut mai. Amah khan min lo hmu hmasa zawk niin ka hria a; min rawn nuih var var a, a hming leh an veng tal ka hriat a ngai. Lammual kan thleng phei tep, Lammual bulah han chhuk thawl leh deuh phawt se ka va pan anga; a hming tal ka hre tur a ni.

Lammual kan thleng phei ta. Mi 4/5 vel chu an chhuk thla ngei tih ka hria, thutna awl remchangah an thu sap sap bawk a; Bus pawh a che leh ta tual tual mai. Hmanhmawh deuhin Bus hma lam pan chuan ka phei ta nghal a, Bus hmalam ka thlen phei chuan Vanapa Hall bul kan thleng chiah a, mahse ka mi zawn reng reng ka hmu ta lo! Seat an chang ve ta emaw tiin Seat-a thute ka’n melh thuak thuak a, anni nufa kha an telve ta hauh lo mai! Treasury Square kan thleng chawpchilh nghal a, rang takin ka chhuk nghal vat a; lei ka rah rual rualin zawn hmuh an harsat tawh tur zia ka hre nghal; beidawng sa in Lammual lam bawk chu ka pan leh ta a, hmuh tur reng reng an lo awm tawh lo.

Hetia kum tam a liam hnu, nupui fanau nena kan nih tak nuaih hnuah hian ani kha engtin nge a awm ve tak zel ang le? A la nula ang nge pasal fanau neiin keini ang bawk hian an chhangchhe ve ang? Kha ni kha vawikhat tal a ngaihtuah chhuak ve angem le? Ka hlohna hmun kha Bazar Bungkawn leh Treasury Square inkar a ni a; khawi vengah nge an awm ang le? Hmu leh ta ila ka la hre thei angem? He zawhna hi ka damchhungin ka in zawt reng tawh mai dawn a nih tak hi.

Khelmual tha siam lawk ang

2010-10-05T09:19:00.004+05:30

Mizoramah hian khelmual tha tia han sawi tur hi a vang ngawt mai. Kan khelmual neih tam zawk hi Sorkar tanpuina a siam, cheng tam tak senral tawhna a ni hlawm a; mahse tun thleng hian thalah a khu em em a, furah a diak em em bawk. Kan khelmualte hi lei laih zawl tawp, Side Drain awm mumal lohna a ni deuh vek a, diak awm pawh a ni a; khu awm pawh a ni reng a ni.

Kan khelmual siam dan leh ram dang ho khelmual siam dan hi a inang chiah lova; keini ang lo takin anni chuan Drainage System hi an ngai pawimawh em em thung. Khelmual han tih pawh hian Baseball Field,Cricket Field, Football Field etc. siam dan (a drainage system) hi a inang lo vek a; Football Field an buatsaih dan tlem i’n tarlang teh ang.

Football Field hi zawl tak angin lang mahse a lai (Halfway Line) hi a rukin tlemin a sang deuh vek a, an Grass (Natural) hnuai Inches 18 vela thukah hian tuihawk luankawr (pipe) an phum ru vek bawk. Goal ban leh Goal ban (Keeper awmna lai ve ve) hi a hniam lai ber a nih avangin Field lai atang hian V Shape in 45o in Goal ban ve ve kawk zawngin HDPE Pipe, inches 8 diameter hi an phum a; chu pipe chu Pea Gravel in an chhilh hnan bawk. Chumi chungah chuan inches 5 vel lei an chap mam leh thlap a; a pawnlang ber, inches 3/4 vel chu Grass to na atan an buatsaih ta thin a ni. Heng tui tui luankawr Pipe te hi Feet 15 inkar dah velah an dah tlangpui a; keini ram ang, ruahtui tamnaah chuan Feet 10 vel danah nise a tha ber ang.

Goal Post inkar lai takah hian tui luankawr pui ber chu a awm a, Feet 15 dan vela an dah, V Shape a Pipe in phum ru ho infinna lai tak a ni. Khelmual dung zui zawnga Pipe phum hi a remchan viau laiin V Shape, 45o a phum hian tui a thlithlawr tha zawk a; chu chu an tihdan tlangpui pawh a ni.

Siam ve dawn ta ila: Kan Field neih sa ho hi awlsam takin hetiang hian a cheibawl mai theih hlawm a; sum erawh sen a ngai ve nual ang.

(1) Field hi dik thlapin a Level la tha ila, khawl kan neih that tawk loh chuan Level Pipe (tui hmang) pawhin dik thlapin Level a lak theih; kan Engineer hausa tak tak te rawn kher lo pawhin Mistiri kan neih ho zawng zawng hi Level la tur chuan rawn tlak tak vek an ni ang, thil harsa a ni lem lo. Goal post awmna ve ve a rukin tih hniam tur a ni a; Halfway Line hi a sang lai ber a ni ang. (A lang tham tur a ni lo)

(2) Field Level kan lak zawh hnuah chuan Pipe phumna tur kan ruahman fel/teh fel a ngai dawn a; V Shape a Pipe phum khi a hautak angreng a, khelmual dungzui zawngin kan phum thung ang.

(3) Pipe phumna tur Feet 10 dan vela kan ruahman zawh hnuah chuan Pipe awmna lai tur kan chhinchhiah ang a; Halfway line atangin tlem in a awih a nga, Goal Post bulah a chhuak ang. Pipe awmna lai tur tak chu a awih tlanin kan lai khuar vek ang

(4) Pipe leh Pipe inkar lai tak chu kan chhinchhiah leh ang a; Pipe awmna atanga Pipe leh Pipe inkar lai tak thleng, a sir tawn tawn kha a Slope in laih tur a ni a, Pipe awmna lai tak kha a V Shape lai tak a lo ni ta a; han en mai chuan Zig Zag ang a lo ni ang.

(5) Pipe chu kan phum fel ta a; an Recommend ang chiah chiah chu kan ramah a awm lo na a, lui dung ami lungte mum, keh mai mai tawh lo tur chi hian Pipe chu kan khuh anga, Pipe leh Pipe inkar, a sang lai ber Level thlengin kan chhung khat ang a, a chhah zawng pawh Pipe hnuai lam atanga inches 5-12 zet (Field laiah chuan Pipe a pawnlang a, Goal Post bulah a thuk) a lo ni ang.

(6) Chung lungte chhun khawm chungah chuan kan ram luia Balu kan tih ve mai, hraw deuh deuh ho hi inches 4 vel tal a chhah, level dik thlapin kan chhung khat leh ang.

(7) Chumi chungah chuan leivung tharlam inches 3/4 vel a chhahin, level dik thlapin kan chhung mar leh ang.

(8) Chumi chungah chuan leitha, hetianga hman tur bika siam (?) kan phul ang. Kg 25 hian 350-570 m2 a cover thei a, Kg 25 hi Pound 25 man a ni. ( http://www.bostonseeds.co.uk/page54.htm#54)

(9) Chumi chungah chuan World Class Football Ground a an hman ang Grass tha chi, a chi (seeds) 50 gms/m2 in uluk takin kan theh ang. Kg 20 hian 400m2 a cover thei. Kg 20 hi Pound 105 man a ni. (a chunga link tho khi)

(10) Reilote hnuah kan inkhel thei ta; enkawl erawh Artificial Grass aiin a hautak hle.

Artificial Grass Quality tha ber chi hi kum 10 danah thlak a ngai niin an sawi a (a link ka theihnghilh tawh), Lammuala an phah hi a Quality tha ber chi a nih a rinawm loh a; kum 8 Warranty an pe pawh hi a awm hle, kum 5-7 velah thlak a ngaih duh hmel. Heng kan han sawi takah te khian Grass chi leh leitha chiah khi ram pawn atanga lakluh ngai awmchhun a ni a; thil hautak lutuk a ni hran lo ang. Ramhlun Sport Complex a Grass chi an theh tak kha a man zat ka hre ta mai lova; a man a to hle tih chiah ka la hria. Thil man to tak tur chu a lo ni lem lo e.

Thlasik rim a nam ta!

2010-10-05T09:18:00.001+05:30

‘Zawngtah a bilhbawlawk ta, zirlai tan tan lak a hun e’ tia min zirtirtupa thusawi kha ka la hre reng thin. September thla chawhnu lam atang hi chuan thlasik rim a lo nam tan tawh a, rilru in Bethlehem lam a hawi deuh nghal vung mai. Thing delh loh, lung deuh loh ta na na na chu a kum telin upat lam kan lo pan ve zel a; mi fate hun hman dan leh keini ang duang hun hman dan lah a inang thei hek lo. Nikum tun ang huna ka thlen chin bak kha pen khat pawhin hma ka la sawn leh ta chuang lo tih ka hria a; mi fate chuan Degree ropui tak tak te, Nobel Prize te hial an hlawhchhuak a sin le.

Bethlehem a nau piang lawm turin rilru a in buatsaih tan a; keini ang mi chhumchhia tan lah chu hun, khel lova lo thleng thin hmuak tur chuan inpeih ni a awm tak tak thei hek lo. Zadeng tlawm tur ang maiin awmze nei loah ro kan rel zing dup a, tangka inchhut reng rengin kan buai a, kan indaih dawn lo tih hre sa reng chungin kan mamawh ber ni lem lo lei tuma rawtna lo siam tawk lah bo lo, pa lu a hai a ni.

He thlasik hian a dan pangngaite bawkin vun lamah a rawn tuan leh dawn; keini ang in tuaihnum peih lo ho chu kan khir leh un mai dawn a ni. Pem chhia a dam har ang a; tlang hrileng kai palh lahin thlasik pum a daih lehnghal. He boruak vuakvet zo lo hian nula thianghlim tam takin an thianghlimna an hloh leh dawn, thalaite hrawk pawh Zu liamkawnah a chang leh ang. Thawhchhuah la nei fumfe lote pawhin zu man to, a senchi deuh kher in tumin an in ‘Contri’ leh diat diat ang a; Um khat pawh Rs. 800 chunglam thah a ni lek pek ang chu. Rawlthar tan lah ‘tih ve chhin’ duhna rilru pian hunlai a ni a; ti ve chhin a sim thei ta lo, mual liamta te thlanlung lah chu thlanmual tinah chhiar tham zet a awm ta.

Mite tana hunpui, hahdamna hun hi kei tan lah hna tam lai a lo ni ve leh chiah bawk a; chawlh lah a lak ve theih der si loh. Kum a’n thar anga, dan pangngai tein tangka kan in hman dak fe hnuah naupang sikul luhna tur buaipuiin nu leh pa kan phi buai tan ang; indaih lo reng rengin hun kan hmang leh dawn. Nakum thlasik a lo thlen hunah meuh pawh he thu bak hi han sawi belh vak tur a awm leh chuangin ka ring lo.

Zupawl tuam

2010-10-05T09:16:00.001+05:30

Thlasik vanglai a ni a, khua lah a vawt vin tuk lehnghal. Aizawl atanga km 80 vel zeta hla khaw pakhatah zupawl tuam turin kan thawk chhuak a; chu khua atang pawh chuan kan pawl tuamna hmun tur chu ke in darkar 3 dawn lai kal a la ngai zui, naupang chhia tih takah min paw thleng a ni deuh ber e.

Unau hmel hai velah chu lo chu kan thleng ve hram a; sipel nuap nuap chunga “Chul Ram Fan Ni” tih Essay ngaihnawm tak ka chhiar thin kha a takin hmu turah ka inngai a; phur pawh ka phur khawp mai. Ram la kal ngai lo tih takah thlam kan han thleng chu ka tan thil thar vek a lo ni a; enghelh a la awm lo bawk nen thlam namthlakah chuan thlamuang takin ka mu ar ar a. Chaw ei sa a kal kan ni bawk a, reiloteah ka mut pawh a lo chhuak vat a, kahthlak ang der ka ni zui ta.

Zan dar 12 velah chuan min rawn kai tho nawk nawk a; mit nuai nawk nawk chungin zupawl tuam tur chuan ka in buatsaih ve ta a. Ka mut hlan khan thil tih ngai zawng zawng an lo tifel vek tawh a lo ni a; a hmawr bawkna, a nuam lai chin chu ka tan. Buhpawl an dahkhawmna hmun chu dap, feet 2 vela sang hian an lo hung phui thap a; a hmawr, a mawng lamah chuan feet 3 vela zau hi an lo zuah awng a, a awng laiah chuan len (net) hi an lo zar thung a; chu chu Zupawl rawn chhuahna lai tur chu a ni. ‘Nang, naupang ber nih manah buhpawlah khian han cheng teh le’ min han ti chu(h), a rang a rangin buhpawl chungah chuan ka’n sapatal ta tak tak a; Zupawl pawh a lo tam na ngiang mai. Mi 2 in len zar chu an veng a; a bak zawngin buhpawl chu kan chen ta a. Zupawl hlau, tlanchhuahna tur zawng khan a awng awmchhun, len zarna lam chu an pan khawm chum chum a; len viltute lahin an lo tingmit hmiah hmiah bawk a, man pawh kan man hnem thawkhat viau.

Zupawl tuam hi khawpuia seiliante chuan kan hre tehchiam lo a, thil nuam ve tak a ni. Zupawl hi Aizawl Bazarah chuan a to thin hle a; Zupawl ni miah lo te pawh Zupawl zawrh a zuar tam tak an awm thin niin an sawi. An lei huai danah a duh mi tan chuan sa tui tak a ni awm e.

Thuhmahruai

2010-10-04T10:00:00.000+05:30

Thian tha te zarah kum 10 chhung zet chu Internet ka lo khawih ve ta reng mai; tunhma deuh kha chuan neihin a tlin loh chu thuhran nise Internet hrim hrim kha keini ang vailenhlo nena in thenawm ve satliah mai tan chuan pawh ve ngawt kha a harsa em em a, kum 10 a liam hnuah erawh chuan thil a lo danglam zo ta.

Heng kum 10 chhung hian keimahah hmasawnna tehchiam a awm lova; mIRC in bul kan tan a, Yahoo Messenger kan ti, Orkut, Facebook etc. velah zawi muanga kan pakai chhoh ve beuh beuh laiin mi chu an pen suau suau a; kan tan umphak theih lah an ni tawh hek lo, an fakawmin an awhawm khawp mai. Hma ka sawn lohna chhan lian tak nia ka hriat tak chu ka tuina zawng chiah ka khawih vang hi a ni. Tun hnai kum 6 chhung vel pawh hian Facebook, Orkut leh Mizo Site zawng zawng deuhthaw hmang/tlawh miah lo hian Football leh Formula One lam chiah ka buaipui a, chutiang site ah chuan ka lut tlut tlut a; mi tan chuan Mi Thar ka lo ni ta reng mai tih tlaikhaw hnuah ka inhrechhuak ta a ni.